بص ...

كل الناس ولاد كلب ما عدا انا و انت !!!

طلع بجد !

الجمعة 23 يناير

كان يوم جميل ...
كان يوم زيارة الجرحي الفلسطينيين بمعهد ناصر


كنا حوالي 30 واحد اغلبنا كان من طب
و اغلب اللي من طب كانوا من خامسة و رابعة
و بالمناسبة يعني كان معانا د/ مصطفي عكر
اول حاجة اتعرفنا علي بعض
و ناس محترمة بجد كلهم و انا اتبسطت اني طلعت معاهم و اتعرفت عليهم
كانت البداية ان كل واحد يقول لنا كده هو طالع ليه .. نيته ايه من الزيارة يعني

( عيادة مريض .. نقول لهم ان احنا معاكم ...نثبتهم ... نشوف جزء من الحقيقة بعنينا .. عايز اعرف هم ازاي صامدين ... نعرف ان احنا قريبين اوي ...نحس ان دول اخواتنا ... ما تبقاش حياتك كلها لمصلحتك بس ... هم ايه وجهة نظرهم عن مصر و المصريين .. عايزين مننا ايه ؟ ... ينصحونا بايه ... عايز اشوف معهد ناصر ... عايز اصلي في مكان جديد يشهد لي يوم القيامة ... استفيد انا من خبراتهم و معاناتهم وصمودهم و ثباتهم ... اعرف ان مشاكلي = و لا حاجة ........ )

----------------

مش هيهمك اوي ان احنا صلينا الجمعة في جامع قصاد المعهد و مجموعة في جامع تاني قريب برضه .. و لا هيهمك ان الكارنيه طلع له فايدة و ما دفعناش التذكرة ... و اتخانقنا جوة مع ادارة المستشفي
علشان كان في ابن اخو اسماعيل هنية في المستشفي و ما كانوش عايزينا ندخل و نتكلم معاه
مش هايهمك ان السواق كان سعيد بينا لاننا اتاخرنا ع المعاد !

المهم
انا هاقول شوية مواقف - و ده اللي يهم - لناس شوفتهم و اتكلمت معاهم
طبعا ما اتكلمتش باستفاضة مع كل الناس لظروف المرض احيانا و لظروف الوقت احيان اخري
نبدأ مع ...........




علاء : طفل ( راجل صغير ) فلسطيني عنده 11 سنة اتصاب في القصف .. عنده 6 اخوات كل اساميهم بتنتهي بالف و همزة وواحد منهم اتصاب و بيتعالج في الشيخ زايد محتفظ بصوره مع منه شلبي و حنان ترك و تامر ! و فرحان بالصور دي جدا !!
الواد ده زي العسل و دمه خفيف اوي هو طفل بس مصاب في رجله بشظية !

******************

احمد : شاب فلسطيني من حركة حماس .. قعد يكلما كتير اوي عن حكومة حماس و انها رجعت الانضباط و الالتزام و اثني علي ناس كتير من قيادات حماس ... كلمنا اكتر عن خريطة غزة و جغرافيتها كلمنا ازاي الناس وقت الضرب كانت ملتزمة بصلاة الجماعة في المسجد ان الجامع بيبقي مليان .. كلمنا و هو شغال ع المعبر اصلا ان المساعدات اللي بتيجي اللي بيخش منها بطريق مباشر بيبقي الادوية .. و المساعدات التانية بتخش عن طريق الامم المتحدة و تحت علمها
كلمنا عن الانفاق و ان غزة عايشة علي الانفاق دي تقريبا ( اكتر من حد قال الحته دي )
كلمنا برضه عن الحصار اكتر و انه كان اول مرة يشوف حاجات كتييييير في مصر حاجات بسيطة جدا بس ماكانش شافها بقاله فترة من بداية الحصار و قال حتي الانابيب ما عدتش موجودة هناك ... و انه هيشتري سبرتاية هنا من مصر لانهم دلوقتي بيطبخوا علي النار !
ادالنا درس في انواع الاسلحة اللي مع الجانبين
قال ان فكرة الانفاق دي مش بس ع الحدود ده فيه منها كتير بين البيوت في غزة و بيستخدمها المقاومين بطريقة ابهرت حتي المحللين الاسرائيليين
تطلب مننا ايه يا احمد ؟
الدعاء و الله و لا حاجة غير الدعاء
كان في ناس بتوزع حاجات عليهم رفض و قال و الله ماله لازمة بس الدعاء و لو هتتبرع اتبرع للي هناك محتاجين اكتر !

******************

فداء
طالبة في كلية الاعلام بالجامعة الاسلامية
عايزة تشتغل في مجال العلاقات العامة و مش عايزة تطلع صحفية
انت عارف في ناس كده تحس انها متفاءلة و بتحب الحياة عارف انت الناس دي
اهي فداء بقي منهم

******************

كان بيتأوه وواضح انه متوجع جدا
كنا ناووين ندخل نسلم عليه سريعا و نطلع علشان ما نتعبوش
لقيناه هو اللي بيتكلم
و قال ان بيته اتهد في القصف
و مات في الموضوع ده زوجته و اولاده
و هو طلع من تحت انقاض بيته بعد يومين
الغريب انه بعد كل كلمة و كلمة كان بيقول الحمد لله

******************

هو عسكري سابق في حركة فتح
مصاب من دبابة مش صاروخ
كان معمول له عملية استكشاف علشان الشظايا اللي اتشرت في البطن
اعلن رأيه في الخلاف و الانشقاق بين جبهتي فتح و حماس بلعن الجهتين

******************

قابلنا بعدها واحد من فتح برضه
شغال مبرمج كمبيوتر
هو كاره لجبهة حماس و شايف انهم بيتعاملوا بقسوة
مع التابعين لحركة فتح لدرجة طرده من شغله
و بيقول اني مع اي حد يرفع راية لا اله الا الله محمد رسول الله
سواء كانت حمرا او خضرا او سودا
( جامدة الكلمة دي علي فكرة )

******************

حاجتين اكتر من حد علق عليهم ..

- لبس بعض من البنات الغير لائق في مصر

- ان احنا في مصر بنقول الاسم الاول و التاني ( محمد حسن )
و هم بيقولو الاسم و اسم العيلة ( محمد الميداني )

******************

- الارض اغلي و لا الولد ؟

= الارض طبعا ... الولد نجيب غيره ! بس الارض لو ضاعت منين نجيب غيرها !

******************

- ربنا ينصركم ان شاء الله

= ياخي النصر ما بييجي بالكلام بييجي بالالتزام .. ييجي بالعمل

******************

(( اللي مش هيضحك مش هيطلع في الصورة ! ))

******************

في زيارة وزيرة القوي العاملة لها
الوزيرة : عايزيننا نفتح لكم المعبر علشان تيجوا و تقعدوا عندنا
الست : و الله لو مليتوا لي الاوضة دي دهب مش هاسيب ارضي

******************

- احنا مش بنخاف منهم
الولاد الصغار مش بيخافوا منهم
الطفل مش بيدخل يستخبي لما يشوف الجندي اليهودي

- حتى جثة الشهيد بيخافوا منها

******************

- بتعملوا ايه لما حد عندكو يستشهد ؟

= انا اخويا استشهد ... و بجد فراق الاخ صعب
بس احنا بنستقبل شهداءنا بالزغاريد !
انا اخويا كان من المجاهدين المقاومين و استشهد و هو عنده 19 سنة واجهم وجها لوجه و استشهد .. كان متوضي و مصلي العصر
و الله في الضرب الاخير انا اتوضيت و صليت ركعتين لله ان انا و زوجي و اولادي الاربعة نستشهد

******************

الحاجة هيام
الحاجة هيام دي بقي حكايتها حكاية
من حظنا انها كانت جاية زيارة لاهلها
و ده ادالنا الفرصة اننا نتكلم معاها
كلمتنا في الاول عن الصلاة في المسجد الاقصي ( اللهم ارزقنا )
و بعد كده عن اهم فترة من فترات حياتها
فترة اعتقالها في السجون الاسرائيلية
كانت حوال سنتين و نص
حكت لنا علي الفترة دي
لحظة اعتقالها ووصفت لنا قسوة الجنود الاسرائيلين
و هم بيقبضوا عليها
هي كانت نشيطة في المقاومة
و اتهموها بانها مخبية متفجرات في البالطو اللي كانت لابساه
حكت اول لحظاتها في السجن
لما اشتبكت مع مجندة اسرائيلية
و وقتها اتضربت بـ(ـبوز البارودة ) في بطنها
و بتعاني من تعب حتي الان نتيجة للضربة دي
بتحكي عن السجن و توصف و بتقول انه قد حمام اوضة المستشفي تقريبا
انه كان كل محتوياته فقط حاجة يتغطوا بيها و جردل لقضاء الحاجة

بتحكي عن حياتهم في السجن
انهم كانوا بيعملوا حلقات ذكر
كانوا بيقروا قران بشكل منتظم
كانوا بيجيبوا نوا المشمش ويكحتوا فيه و يعملوا منه سبح
كانوا بيصوموا صوم داوود يوم و يوم

بتحكي عن المعاملة الغير ادمية في السجون
بتحكي عن التفتيش الدائم
و عن قلقهم الدائم من السجينات
بتحكي عن منع الضوء عنهم لايام
لدرجة ان فتيات منهم اتصابوا بامراض جلدية
الاكل الردئ اللي كان بيتقدم لهم
حكت عن اصعب لحظاتها في السجن
لما جالها خبر وفاة والدتها

بتحكي عن العصافير اللي كانت في السجن ( العصافير بالفلسطيني يعني ناس بتدسهم الـ .... احنا : عارفين عارفين )

بتحكي عن عزة و عن كرامه ...
كانوا مخصصين مجندة لتفتيشنا ما كناش بنرضي جندي يلمسنا
كان قبل ما الظابط يمر كنا لازم نلبس عباية الصلاة
بتحكي عن معني الكرامة كتير
ان حياة الانسان مالهاش لزمة من غير عزة من غير كرامة
بتحكي عن حد كل همه الاكل و بس و بتوصفه الوصف الصح انه كده يبقي دابة !

بتحكي عن زميلات في السجن
عن واحدة كانت معاها و اتحكم عليها بـ 16 مؤبد
( و في السجون الاسرائيلية لو مت قبل ما تكمل العقوبة بيخلوا جثتك تكمل العقوبة )
و اد ايه متأثرة بيها لانها كانت مريضة و كانوا بيقسموا الادوية المسكنة مع بعض ( لاحظ ان دي حكايات حقيقية
سمعتها بودني مش شوفتها في فيلم )
و علي رغم مرضها ده
كانت - زميلتها - ساعدت المقاومين في عمليتين استشهاديتين

وريتنا صور لاخوها الشهيد
و ريتنا صور لابنها اللي موت خاله ما خلاهوش جبان انه يشيل سلاح
و متصور بيه من و هو عنده 3 سنين


اخر كلمة اللي خلتها تتأثر اوي و تبكي
قالت اني لما ابقي في مصر
مش باحب انزل في العيد
لاني لما باشوف الاطفال فرحانه
بافتكر اطفالنا !

لسه عندها ثقه كبيرة اوي اوي في المقاومة

اتكلمت في حاجات كتيييييير اوي
و كلامها ما يتشبعش منه


في حاجات لما كنت باسمعها في التلفزيون
باقول ده كلام افلام و كلام علشان الكاميرا بتصور
بس دلوقتي عرفت انه طلع بجد !

ملحوظة

النهاردة يوم 22 / 1 /2009
و اليوم ده مش هيتكرر تاني
يعني حتي لو عشت 100 سنة
مش هتعيش يوم 22 يناير 2009 مرة تانية


و مين عارف انت ممكن تعيش 23 يناير 2009 اصلا و لا لأ ؟!



.

ابدا بنفسك !

Be the change you want to see in the world
Ghandi

هذا البوست للتذكير بحقيقة قد تغيب عن البعض
" ان كل واحد عنده ايدين و رجلين و راس و لسان !!! "

وان في حاجات كتير انت ممكن تعملها
و مش محتاجة مؤازرة جماهيرية و لا اجماع شعبي
و لا التفاف الناس حواليك !!

بلاش حجج خايبة !!


.

اعمل ايه ؟؟

( 1 )

المقاطعة

" لا توجد دجاجة تذبح دون أن تملأ الدنيا صراخاً.. حسن ما جدوى الصراخ ؟.. إنها ستذبح في كل الظروف ، لكني أقول لك إنها تعبر عن كيانها .. عن احتجاجها .. ومن دون هذا هي لا وجود لها "

د احمد خالد توفيق

قائمة بالمنتجات

http://www.kate3.com

ده موقع حملة المقاطعة هتلاقي فيه مقالات و فتاوي بتناقش الموضوع ده

( 2 )

تحريك القضية و نشر الوعي

كان واحد صديق كاتب الكلام ده :

أعتقد أن أفضل ما يمكنني فعله في الظروف الحالكة الحالية هو "نشاطي علي الشبكة"
رسائل
احتجاجات رسمية لمنظمات عالمية
بريد لهيئات رسمية
نقاش قصير أو طويل مع أحد أبناء الغرب للتعريف بالقضية وتصحيح مفاهيم مغلوطة
نشر لأفلام وثائقية ناقشت وبوضوح ظلم الآلة الإعلامية الغربية والأمريكية خصوصاً للأحداث الإسلامية والعربية

النشاطات على الشبكة عديدة
فقط تحتاج للعزيمة والخبرة البسيطة في مجال الكمبيوتر والإيمان التام بأن كل ضغطة زر تصب في ميزان حسناتك ولها نفع للمجاهدين في كل مكان

ملفات جايز تساعدك :

http://www.islamcg.com/Magazine/Help_Gaza.rar

http://www.alamtany.com/forums/index.php?act=attach&type=post&id=302

انشر فيديوهات

انشر صور

اتكلم مع الناس اللي بره

و اللي في مصر كمان ( للاسف ) !!

( 3 )

قتل الإنهزامية .. وعلاج الإحباط .. ورفع الروح المعنوية!

مع ان الواحد مكتئب اصلا

بس فعلا مش طالبة أي احباط دلوقتي خالص

احنا مقصرين

احنا مش رجالة احنا مش عارف ايه

و الله يا جدعان هو ده صحيح الي حد ما

بس بلاش نظام خلاص يا عم مااناش مذاكر اللي ذاكر ذاكر من زمان

بلاش يكون كلامنا دافع لسلبية

لو الكلام ده بغرض التحفيز كان بها

لو كان بسبب لعن المجتمع و الحكام و الناس و نفسك احيانا فمامنوش لازمة

( 4 )

التبرع بالمال.

في كفر الشيخ انا اعرف الاماكن التالية :

- مسجد الخياط لجنة الزكاة دول بيودوا لبنك ناصر و بيتسحب من فلسطين

- بنك ناصر ( مش فاكر رقم الحساب حاليا )

- قاعة ابو حجر( بيوصلوا للهلال الاحمر )

- الهلال الاحمر

- الحزب الوطني

- نقابة الاطباء ( لجنة الاغاثة التابعة لاتحاد الاطباء العرب )

عامة يعني في الاماكن دي

المجلس الإسلامي العالمي للدعوة والإغاثة - القاهرة

هاتف:

002024091811
002024091810

فاكس:
002024092823

لجنة الإغاثة الإنسانية/ نقابة الأطباء
هاتف:
002027963685
7943166
فاكس:
00202-7962751

بنك فيصل الإسلامي
رقم الحساب: 187460 حساب تبرعات

اتحاد الأطباء العرب
لجنة الإغاثة والطوارئ

القاهرة: 42 ش القصر العيني - دار الحكمة ت/27961792
مدينة نصر: 7 ش على أمين - تقاطع ش الطيران بجوار المخبز الآلي ت/24019369
الإسكندرية: 22 شارع بورسعيد - الشاطبي
ت/ 035907590
موبيل/0103226244

للتبرع عن طريق التحويلات البنكية:
رقم الحساب: 0/1/21090 بنك قناة السويس - الدقي

أو cib البنك التجاري الدولي
1090002914

ليصلك المندوب في حالات المبالغ الكبيرة نسبيا :
موبيل 0104002121

( 5 )

التبرع بالدم

في حملة تحت اشراف نقابة الصيادلة بالتعاون مع نقابة المهن الطبية

و عنوان المكان : خلف دار الحكمة ( نقابة الأطباء ) في شارع القصر العيني

حوالي خمس دقايق من كلية طب القصر العيني

و الحملة كانت المفروض يومين بس ( الأربعاء و الخميس ) 7 و 8 يناير

بس نظرا للاقبال الشديد - ماشاء الله - قرر منظمي الحمله تمديدها حتى يوم الأحد الساعه 9 مساء

ده اللي انا عارفه

مش عارف في كفر الشيخ و المحافظات التانية هل في حاجة زي كده و لا لأ

و لو مافيش هل ممكن ان احنا نعمل حملة تبرع بالدم

عندنا و لا لأ ؟

( 6 )

الدعاء لأهل فلسطين.

الدعاء لأهل فلسطين بالثبات والنصر، والدعاء على اليهود وأعوانهم بالهلكة والاستئصال ..
والدعاء -يا إخواني- من أقوى أسلحة المؤمنين في حربهم مع الكافرين.. الدعاء ليس شيئًا سلبيًا .. كثيرٌ من الناس يعتقدون أن الدعاء أمرٌ مقابلٌ للأخذ بالأسباب ..
أبدًا .. الدعاء يرفعه العمل الصالح .. إن ترك المؤمن الأسباب واكتفى بالدعاء فهو متواكل ولا يرجى له إجابة.. ولذلك جعلتُ الدعاء الوسيلة الخامسة حتى لا يعتمد المرء عليه وينسى بقية الواجبات ..
o من أدراك أن طائرة تقصف فَيُصدُ قصفُها بدعائك ..
o من أدراك أن مخططًا يهوديًا يدبر في الظلام فيحبط بدعائك ..
o من أدراك أن شابًا فلسطينيًا أطلق حجارةً أو رصاصة فأصابت هدفها بدعائك ..
نريد دعاءً لحوحًا مستفيضًا متكررًا في كل يوم وليلة أكثر من مرة ..

• دعاء في القنوت وفي السجود ..
• دعاء فيه يقين في الإجابة ..
• دعاء ليس فيه عجلة ولا يأس ..
• دعاءٌ فيه حضور للقلب .. وتضرع وتذلل وانكسار لله عز وجل ..
• دعاءٌ من رجال يتحرون المال الحلال،ويتحرون الأوقات الفاضلة ويتحرون الأحوال الشريفة ..
• دعاءٌ في جوف الليل وقبل الفجر ..
• دعاءٌ يجتمع فيه أهل البيت وأهل العمل وأهل المسجد ..

أخي الحبيب إن أردت أن تساعد المحصورين والمجاهدين والجوعى والجرحى .. فاستيقظ الليلة .. الليلة قبل الفجر بساعة أو بنصف ساعة وادع الله لهم .. أن يوحد صفَّهم، ويسددَ رميتَهم، ويقوي شوكتَهم، ويثبت أقدامَهم، ويُعلي راياتِهم، وينصرهم على أعداءهم، ويُمكنَ لهم في أرضهم، ويزلزل الأرض من تحت أقدام أعدائهم..
والله لا محالة سيستجيب .. فقد وعد .. {وَقَالَ رَبُّكُمُ ادْعُونِي أَسْتَجِبْ لَكُمْ}

( 7 )

رفع الروح المعنوية بالزيارات

في معهد ناصر

او أي من المستشفيات المصرية اللي بتستقبل الجرحي الفلسطينيين

لو اي جهة او مكان بتنظم زيارة يا ريت حد يقول

( 8 )

رفع الروح المعنوية بالاتصالات

هي فايدتها كمان ان الموضوع هيتحرك في قلبك اكتر

لما تكلم واحد ( المفروض انه اخوك )

و تحس ان الموضوع قريب منك

تكلمهم ترفع من روحهم المعنوية

تعرفهم ان احنا معاهم !

تتصل ازاي ؟

مفتاح الدولة ::

00970

ثم مفتاح المنطقة....قطاع غزة ::

( 8 )

ثم أحد الأرقام التالية

( 205 )
-------
( 213 )
------
( 245 )
-------
( 247 )
---------
( 280 )
----------
( 282 )
----------
( 283 )
------------
( 284 )
-----------
( 286 )
-----------
( 287 )

ثم...أي أربع أرقام عشوائية

( 9 )

المظاهرات السلمية

من غير تكسير او افساد

ايوة ده شئ انت بتضغط بيه

و انا شايف انه صح جدا

و بمطالب محددة مش كبيرة و لا حاجة يعني

طرد سفير ( فنزويلا )

الغاء اتفاقيات كويز و غاز و ما شابهها من خيابات اخري

السماح بمرور المزيد من المساعدات للقطاع

و اظن ان دي اقل اقل المساعدات اللي ممكن تتقدم

( 10 )

انك تذاكر او تشتغل

--------------------------

ملحوظة 1 :
الموضوع منقول من كذا مكان و بتصرف
و ربنا يجازي اي حد كتب كلمة في الموضوع ده خيرا
و نسأل الله الاخلاص !

ملحوظة 2 :
العناصر دي مش بترتيب الاهمية و لا بترتيب ابجدي و لا باي ترتيب

ملحوظة 3 :
ما لا يدرك كله لا يترك كله !

اه يا براح عمال بيضيق *

ساح يا بداح يا سؤال جراح

ما الذي كان ومعدش وراح ؟

قمر انطفي ؟

انكفي و اختفي

نهر ما بلش حتي الريق

وآه يا براح

آه يا براح عمال بيضيق

صبح وزيه الصبح التاني

ليل ملضوم في الليل التاني

وانا مش رايح

أنا مش جاي

أنا مش واقف حتي مكاني

* من البوم محمد منير ( افتح قلبك )

ووقفنا وقفة رجالة !

= انا هاطفي التلفزيون يا عم دي الاخبار النهاردة كلها تجيب الضغط !

- و الله يا ياسر ما ينفعش الكلام اللي بيحصل ده

= انا معاك انه ما ينفعش و كل حاجة بس هنعمل ايه في ايدينا ايه نعمله يعني ؟

- انت عارف احنا مشكلتنا انهم بيهاجمونا الاول و بيبقي المفروض مننا ان احنا ندافع او نرد عليهم
مش احنا اللي بناخد المبادرة و الايد السابقة هي اللي بتكسب دايما

= هي المصيبة الاكبر انهم مسيطرين علي الاعلام بشكل جامد جدا جدا
بحيث يبينوا للرأي العام انهم يا عيني مظلومين و قال ايه كل الناس ضدهم !!
و بالتالي تلاقي الناس كلها متحيزة لهم !

- اللي مضايقني المرة دي ان الناس اللي ضدنا هم اهلنا اللي المفروض كانوا يبقوا معانا اصلا

= ما تعرفش الريس بتاعنا هيعمل ايه ؟ احنا مش لازم نسيب ولادنا يروحوا ببلاش كده !

- هو قال انه لن يتم التفريط في أي ..

= خلاص يا عم خلاص .. محفوظة و الله بقاله كتير بيقولها و ما بيعملش حاجة في الاخر

- اسمع احنا لازم نعمل حاجة !

= هنعمل ايه يعني يا خويا ؟

- لا احنا لازم ما نكتفيش بالفرجه علي اللي بيحصل بس كده و خلاص
لو الشباب اللي زي و زيك ما شاركش
تفتكر مين اللي هيشارك ؟
تفتكر هنعرف ناخد حقنا ازاي ؟

= .................

- مش عارف ترد طبعا ؟

= انا عن نفسي باعمل اللي باقدر عليه و بادعيلهم دايما

- يا ياسر انا معاك ان الدعاء مهم جدا و كل حاجة
بس احنا ممكن نعمل حاجات تانية
حتي الهتافات و اليفط و الكلام ده برضه حاسس انه مش كفاية
احنا لازم يبقي لنا دور اكبر

= نعمل ايه يعني ؟ انا عايز اعمل أي حاجة انا مش عايز ابقي مقصر !

- اسمعني يا ياسر .. انت راجل ؟

= احم .. و ده سؤال .. راجل طبعا

- طب امسك ده !

= ايه ده !!!!
الله يخرب بيتك !!
انت عايز توديني في داهية و لا ايه ؟
ايه ده يا ابني ؟
جبته منين ده ؟

- ايه يا عم في ايه عمرك ما شوفت صاروخ ! ده صاروخ – عادي يعني ! - !

= صاروخ !!

- ايه انت هترجع في كلامك و لا ايه ؟
و لا انت فاكر الموضوع هزار ؟

= لا .. بس يعني .......

- لا بس و لا ما بســـ(ـش )!
انت دلوقتي راجل صاحب قضية و مؤمن بيها يبقي لازم تدافع عنها بكل قوتك

= طب هتعدي الصواريخ دي لجوة ازاي ؟

- مالكش دعوة انا هاتصرف .. المهم انت معانا ؟

= طبعا معاكم .. و ربنا يوفقنا

- يا رب انصرنا عليهم ياااااااااااااااا رب !

= النصر من عندك يااااااا رب !

ـــــــــــــــــــــــــــــــــــــــــــــــــــ

= الحمد لله وصلنا

- ايه ده يخرب عقلك ازاي العسكري ما شافكش و انت داخل بالصواريخ ؟

= عيب عليك

ـــــــــــــــــــــــــــــــــــــــــــــــــــ

= الحق دول بيضربوا صواريخ علينا

- طب اعمل ايه ؟

= تعمل ايه ! طلع الصاروخ اللي معاك و اضربه عليهم طبعا
ياللا معايا بسرعة

- بسم الله بووووووووووووو .. اووووووووووووو اسمعلاااوي !!!

= بوووووو ..... اوووووووووووووووووووووو اسمعلاوي !!



ـــــــــــــــــــــــــــــــــــــــــــــــــــ


* تخليدا لمعركة الاسماعيلي الاهلي يناير 2009




* ملحوظة جانبية حدثت بعض المعارك البرية في قطاع غزة و لكنها ليست ذات بال !

استمتع بالسئ

(( استمتع بالسئ فالقادم اسوأ ))

كل مرة كنا بنتضرب فيها
كان بيبقي لينا رد مختلف
ممكن انت تفتكر ان ردنا دايما هو رد واحد
بس ده يرجع لان تاريخ الدول مش بيتقاس بالدقايق و الساعات و الايام
لا ده بيتقاس بالسنين و العقود
فلو بصيت للموضوع من بعيد شوية هتلاقي ان فيه كذا مرحلة للــ(ـرد ) علي الضرب


(1)
لما بنتضرب بنرد
او بنحاول نرد
مرة تصيب مرة تخيب
ماشي الحال مش مشكلة بس
فيه رد



(2)

و بعدين
بقينا بنتضرب
بس بنشجب و بندين العدو و للامانة ساعات كنا بنستنكر كمان
راجع بيانات جامعة الدول العربية و الدول العربية ذات نفسها
و تعلم كيف يكون الشجب و كيف تكون الادانة علي حق !




(3)

بعدها بنتضرب
بس تقريبا بقي الضرب عادي
و لا اي حاجة
و خبر موت 3 او 4 بقي مش خبر مثير و لا اي حاجة
علي الرغم يا اخي ان ده لو مش مسلم و لا عربي و لا بني ادم حته ده روح
و بقيت باقلب القناة عن الخبر المتكرر ده علشان اتابع مسلسل عربي




(4)

بعدها
المرة دي بقي بنتضرب
و بنتضرب جامد
و اللي بنرد بيه
ان احنا بنلمي اللوم علي بعض
ان احنا بنتخانق مع بعض
و بنتبادل اهتمامات

لا حماس كانت المفروض ما ضربتش صاروخين كانت اسرائيل
لا دي مصر اللي كانت عارفة بمعاد الضرب و ما عملتش حاجة

لو حماس ضربت اسرائيل او ما ضربتهاش
لو مصر كانت عارفة المعاد او مش عارفه

مش هتفرق

احنا العدو بتاعنا واحد و قدامنا
و دلوقتي هو بيضربنا
يبقي مش المنطقي ان احنا نسيب كل ده
و نفضي لخلافاتنا الخايبة دلوقتي

اللي فارق معايا بجد
علي الاقل دلوقتي و في ناس دلوقتي بتموت
ان احنا نحاول ان احنا نعمل حاجة لناس
بني ادمين عرب و مسلمين زينا
غير ان احنا نمصمص شفايفنا و نقول يا حرام
او ان احنا نشتم في الاسرائيلين ايوة يا عم هم ولاد كلب و بعدين
غير ان احنا نقعد نلقي الاتهامات علي بعض ( اه لو هنشتم حد نشتم في اسرائيل دلوقتي مش في بعض ! )
بجد نفسي
و اكيد نفسنا كلنا نعمل حاجة ايجابية
بس انا لسه لغاية دلوقتي مش عارف الحاجة دي تطلع ايه ؟!!!!
و يا ريت اللي عارف حاجة مفيدة ممكن تتعمل يقول !

كوميكس

كوميكس !

عرض خاااص :
بامكانك استبدال ايران بـ ( مصر - حماس - سوريا )